Ṣaṣṭhaṃ kośasthānam
Technical Details
ṣaṣṭhaṃ kośasthānam
om namo buddhāya||
kleśaprahāṇāmākhyātaṃ satyadarśanabhāvanāt|
dvividho bhāvanāmārgo darśanākhyastvanāsravaḥ||1||
satyānyuktāni catvāri duḥkhaṃ samudayastathā|
nirodhamārga iti eṣāṃ yathā'bhisamayaṃ kramaḥ||2||
duḥkhā stridūḥkhatāyogādyathāyogamaśeṣataḥ|
manāpā amanāpāśca tadanye caiva sāsravāḥ||3||
yatra bhinnena tadbuddhiranyāpohe dhiyā ca tat|
ghaṭārthavatsaṃvṛtisat paramārthasadanyathā||4||
vṛttasthaḥ śrutacintāvānbhāvanāyāṃ prayujyate|
nāmobhayārthaviṣayā śrutamayyādikā dhiyaḥ||5||
vyapakarṣadvayavataḥ nāsaṃtuṣṭamahecchayoḥ|
labdhe bhūyaḥspṛhā'tuṣṭiralabdhecchā mahecchatā||6||
viparyāsāttadvipakṣau tridhātvāptāmalau ca tau|
alobhaḥ āryavaṃśāśca teṣāṃ tuṣṭayātmakāstrayaḥ||7||
karmāntena tribhirvṛttiḥ tṛṣṇotpādavipakṣataḥ|
mamāha kāravastvicchātatkālātyantaśāntaye||8||
tatrāvatāro'śubhayā cānāpānasmṛtena ca|
adhirāgavitarkāṇām śaṃkalā sarvārāgiṇām||9||
āsamudrāsthivistārasaṃkṣepādādikarmikaḥ|
pādāsthna ākapālārdhatyāgāt kṛtajayaḥ smṛtaḥ||10||
atikrāntamanaskāro bhrūmadhye cittadhāraṇāt|
alobho daśabhūḥ kāmadṛśyālambā nṛjā'śubhā||11||
ānāpānasmṛtiḥ prajñā pañcabhūrvāyurgīcarā|
kāmāśrayā na bāhyānām ṣaḍ vidhā gaṇanādibhiḥ||12||
ānāpānau yataḥ kāyaḥ sattvākhyau anupāttakau|
naiḥṣyandikau nādhareṇa lakṣyete manasā ca tau||13||
niṣprannaśamathaḥ kuryāt smṛtyupasthānabhāvanām|
kāyaviccittadharmāṇāṃ dvilakṣaṇaparīkṣaṇāt||14||
prajñā śrutādimayī anye saṃsargālambanāḥ kramaḥ|
yathotpatti catuṣkaṃ tu viparyāsavipakṣataḥ||15||
sa dharmasmṛtyupasthāne samastālambane sthitaḥ|
ānityaduḥkhataḥ śūnyānātmatastānvipaśyati||16||
tata ūṣmagatotpattiḥ taccatuḥsatyagocaram|
ṣoḍaśākāram ūṣmabhyo mūrdhānaḥ te'pi tādṛśāḥ||17||
ubhayākaraṇaṃ dharmeṇa anyairapi tu vardhanam|
tebhyaḥ kṣāntiḥ dvidhā tadvat kṣāntyā dharmeṇa vardhanam||18||
kāmāptaduḥkhaviṣayā tvadhimātrā kṣaṇaṃ ca sā|
tathāgradharmāḥ sarve tu pañcaskandhāḥ vināptibhiḥ||19||
iti nirvedhabhāgīyaṃ caturdhā bhāvanāmayam|
anāgamyā ntaradhyānabhūmikam dve tvadho'pi vā||20||
kāmāśrayāṇi agradharmān dvayāśrayān labhate'ṅganā|
bhūmityāgāttyajatyāryastāni anāryastu mṛtyunā||21||
ādye dve parihāṇyā ca maulestatraiva satyadṛk|
apūrvāptirvihīneṣu hānī dve asamanvitiḥ||22||
mūrdhalābhī na mūlacchit kṣāntilābhyanapāyagaḥ|
śiṣyagotrā nnivartya dve buddhaḥ syāt trīṇyapītaraḥ||23||
ābodheḥ sarvamekatra dhyānāntye śāstṛkhaḍgayoḥ|
prāktebhyo mokṣabhāgīyaṃ kṣipraṃ mokṣastribhirbhavaiḥ||24||
śrutacintāmayaṃ trīṇi karmāṇi ākṣipyate nṛṣu|
laukikebhyo'gradharmebhyo dharmakṣāntiranāsravā||25||
kāmaduḥkhe tato'traiva dharmajñānaṃ tathā punaḥ|
śeṣe duḥkhe'nvayakṣāntijñāne satyatraye tathā||26||
iti ṣoḍaśacitto'yaṃ satyābhisamayaḥ tridhā|
darśanālambakāryākhyaḥ so'gradharmaikabhūmikaḥ||27||
kṣāntijñānānyanantarya muktimārgā yathākramam|
adṛṣṭadṛṣṭerdṛṅgmārgastatra pañcadaśa kṣaṇāḥ||28||
mṛdutīkṣṇendriyau teṣu śraddhādharmānusāriṇau|
ahīnabhāvanāheyau phalādyuapratipannakau||29||
yāvat pañcaprakāraghnau dvītīye'rvāṅnavakṣayāt|
kāmādviraktāvūrdhvaṃ vā tṛtīyapratipannakau||30||
ṣoḍaśe tu phalasthau tau yatra yaḥ pratipannakaḥ|
śraddhādhimuktadṛṣṭyāptau mṛdutīkṣṇendriyau tadā||31||
phale phalaviśiṣṭasya lābho mārgasya nāstyataḥ|
nāprayukto viśeṣāya phalasthaḥ pratipannakaḥ||32||
navaprakārā doṣā hi bhūmau bhūmau tathā guṇāḥ|
mṛdumadhyādhimātrāṇāṃ punarmṛdvādibhedataḥ||33||
akṣīṇabhāvanāheyaḥ phalasthaḥ saptakṛtparaḥ|
tricaturvidhamuktastu dvitrijanmā kulaṃkulaḥ||34||
āpañcamaprakāraghno dvitīyapratipannakaḥ|
kṣīṇaṣaṣṭhaprakārastu sakṛdāgāmyasau punaḥ||35||
kṣīṇasaptāṣṭadoṣāṃśa ekajanmaikavīcikaḥ|
tṛtīyapratipannaśca so'nāgāmi navakṣayāt||36||
so'ntarotpannasaṃskārāsaṃskāraparinirvṛtiḥ|
ūrdhvastrotāśca sa dhyāne vyavakīrṇo'kaniṣṭhagaḥ||37||
sa pluto'rdhaplutaḥ sarvacyutaśca anyo bhavāgragaḥ|
ārūpyagaścaturdhānyaḥ iha nirvāpako'paraḥ||38||
punastrīṃstrividhān kṛtvā nava rūpopagāḥ smṛtāḥ|
tadviśeṣaḥ punaḥ karmakleśendriyaviśeṣataḥ||39||
ūrdhvastroturabhedena sapta sadgatayo matāḥ|
sadasadvṛttyavṛttibhyāṃ gatāpratyāgateśca tāḥ||40||
na parāvṛttajanmāryaḥ kāme dhātvantaropagaḥ|
sa cordhvajaśca naivākṣasaṃcāraparihāṇibhāk||41||
ākīryate caturtha prāk niṣpatti kṣaṇamiśraṇāt|
upapattivihārārtha kleśabhīrutayā'pi ca||42||
tatpāñcavidhyātpañcaiva śuddhāvāsopapattayaḥ|
nirodhalābhyanāgāmī kāyasākṣī punarmataḥ||43||
ābhavāgrāṣṭabhāgakṣidarhattve pratipannakaḥ|
navamasyāpyānantaryapathe vajropamaśca saḥ||44||
tatkṣayāptyā kṣayajñānaṃ āśaikṣo'rhannasau tadā|
lokottareṇa vairāgyaṃ bhavāgrāt anyato dvidhā||45||
laukikenāryavairāgye visaṃyogāptayo dvidhā|
lokottareṇa cetyeke tyakte kleśāsamanvayāt||46||
bhavāgrādhavimuktordhvajātavattvasamanvayaḥ|
anāsraveṇa vairāgyamanāgāmyena sarvataḥ||47||
dhyānātsāmantakādvā'ntyo mukti mārgastribhūjaye|
nordhvaṃ sāmantakāt āryairaṣṭābhiḥ svordhvabhūjayaḥ||48||
vimuktyānantaryapathā laukikāstu yathākramam|
śāntādyudārādyākārāḥ uttarādharagocarāḥ||49||
yadyakopyaḥ kṣayajñānādanutpādamatiḥ na cet|
kṣayajñānamaśaikṣo vā dṛṣṭiḥ sarvasya sā'rhataḥ||50||
śrāmaṇyamamalo mārgaḥ saṃskṛtāsaṃskṛtaṃ phalam|
ekānnavatistāni muktimārgāḥ saha kṣayaiḥ||51||
catuṣphalavyavasthā tu pañcakāraṇasaṃbhavāt|
pūrvatyāgo'nyamārgāptiḥ kṣayasaṃkalanaṃ phale||52||
jñānāṣṭakasya lābho'tha ṣoḍaśākārabhāvanā|
laukikāptaṃ tu miśratvānāsravāptiḥ dhṛteḥ phalam||53||
brāhmaṇyaṃ brahmacakraṃ ca tadeva brahmavartanāt|
dharmacakraṃ tu dṛṅmārgaḥ āśugatvādyarādibhiḥ||54||
kāme trayāptiḥ antyasya triṣu nordhva hi dṛkpathaḥ|
asaṃvegādiha vidhā tatra niṣṭheti cāgamāt||55||
ṣaḍarhanto matāḥ teṣāṃ pañca śraddhādhimuktijāḥ|
vimuktiḥ sāmayikyeṣām akopyākopyadharmaṇaḥ||56||
ato'samayamukto'sau dṛṣṭiprāptānvayaśca saḥ|
tadgotrā āditaḥ kecitkeciduttāpanāgatāḥ||57||
gotrāccaturṇāṃ pañcānāṃ phalāddhāniḥ na pūrvakāt|
śaikṣānāryāśca ṣaḍgotrāḥ saṃcāro nāsti darśane||58||
parihāṇistridhā jñeyā prāptāprāptopabhogataḥ|
antyā śāsturakopyasya madhyā cānyasya tu tridhā||59||
mriyate na phalabhraṣṭaḥ tadakārya karoti na|
vimuktyānantaryapathā navākopye atisevanāt||60||
dṛṣṭayāptatāyāmekaikaḥ anāsravāḥ nṛṣu vardhanam|
aśaikṣo nava niśritya bhūmīḥ śaikṣastu ṣaṭ yataḥ||61||
saviśeṣaṃ phalaṃ tyaktvā phalamāpnoti vardhayan|
dvau buddhau śrāvakāḥ sapta navaite navadhendriyāḥ||62||
prayogākṣasamāpattivimuktyubhayataḥ kṛtāḥ|
pudgalāḥ sapta ṣaṭ tvete dvau dvau mārgatraye yataḥ||63||
nirodhalābhyubhayatovimuktaḥ prajñayetaraḥ|
samāpattīndriyaphalaiḥ pūrṇaḥ śaikṣo'bhidhīyate||64||
aśaikṣaparipūrṇatvaṃ dvābhyām mārgaḥ samāsataḥ|
viśeṣamuktyānantaryaprayogākhya ścaturvidhaḥ||65||
dhyāneṣu mārgaḥ pratipatsukhā duḥkhā'nyabhūmiṣu|
dhanyābhijñā mṛdumateḥ kṣiprābhijñetarasya tu||66||
anutpādakṣayajñāne bodhiḥ tādanulomyataḥ|
saptatriṃśattu tatpakṣyāḥ nāmato dravyato daśa||67||
śraddhā vīryaṃ smṛtiḥ prajñā samādhiḥ prītyupekṣaṇe|
praśrabdhiśīlasaṃkalpāḥ prajñā hi smṛtyupasthitiḥ||68||
vīryaṃ samyakprahāṇākhyamṛddhipādāḥ samādhayaḥ|
pradhānagrahaṇaṃ sarve guṇāḥ prāyogikāstu te||69||
ādikarmikanirvedhabhāgīyeṣu prabhāvitāḥ|
bhāvane darśane caiva sapta vargā yathākramam||70||
anāsravāṇi bodhyaṅgamārgāṅgāni dvidhetare|
sakalāḥ prathame dhyāne anāgamye prītivarjitāḥ||71||
dvitīye'nyatra saṃkalpāt dvayostaddvayavarjitāḥ|
dhyānāntare ca śīlāṅgaistābhyāṃ ca triṣvarūpiṣu||72||
kāmadhātau bhavāgre ca bodhimārgāṅgavarjitāḥ|
trisatyadarśane śīladharmāvetyaprasādayoḥ||73||
lābho mārgābhisamaye buddhatatsaṃghayorapi|
dharmaḥ satyatrayaṃ bodhisattvapratyekabuddhayoḥ||74||
mārgaśca dravyatastu dve śraddhā śīlaṃ ca nirmalāḥ|
noktā vimuktiḥ śaikṣāṅgaṃ baddhatvāt sā punardvidhā||75||
asaṃskṛtā kleśahānamadhimuktastu saṃskṛtā|
sāṅgaḥ saiva vimuktī dve jñānaṃ bodhiryathoditā||76||
vimucyate jāyamānasaśaikṣaṃ cittamāvṛteḥ|
nirudhyamāno mārgastu prajahāti tadāvṛtim||77||
asaṃskṛtaiva dhātvākhyā virāgo rāgasaṃkṣayaḥ|
prahāṇadhāturanyeṣāṃ nirodhākhyastu vastunaḥ||78||
nirvidyate duḥkhahetukṣāntijñānaiḥ virajyate|
sarvairjahāti yaiḥ evaṃ catuṣkoṭikasaṃbhavaḥ||79||
abhidharmakośe mārgapudgalanirdeśo nāma
ṣaṣṭhaṃ kośasthānaṃ samāptamiti||